Եկեղեցին Հայկական / Վահան Թէքէեան (Արտասանութիւն)

 

Եկեղեցին Հայկական
(06:00 min. – 09:00 min.)
*Վահան Թէքէեան

Արտասանութիւն
ասմունքող՝ ողբ. Թալին Էօզգալայճեան
 (հատուած Գատըգիւղի Ս.Թագաւոր Եկեղեցւոյ Մանկանց Երգչախումբի 1991-ի ելոյթէն)

Եկեղեցին Հայկական

Եկեղեցին Հայկական, ծննդավայրն է հոգւոյս,
Ինչպես քարայր մ’ընդարձակ, պարզ ու խորհուրդ, մութ ու լոյս,
Իր գաւիթովն հիւրընկալ, իր լայն բեմով, ու հեռուն,
Կանգնած իր լուռ խորհանով, որ կարծես նաւ մ’է ծըփուն…

Եկեղեցին Հայկական, ես աչքըս գոց կը տեսնեմ,
Ու կը շնչեմ, կը լսեմ՝ իր Յիսուսով մանկադէմ,
Իր սեղանէն մխացող, գուլայ – գուլայ խունկերով,
Եւ իր պատերը ցնցող աղօթքներով ալեխռով…

Եկեղեցին Հայկական բարձըր բե՛րդն է հաւատքին
Իմ պապերուս` որ հողէն զայն քար առ ար հանեցին
Եւ երկինքէն իջուցին զայն ցօղ առ ցօղ , ամպ առ ամպ
Ու թաղուեցան անոր մէջ հանդարտութեամբ, հեզութեամբ…

Եկեղեցին Հայկական մեծ վարագոյր մ’ը բանուած,
Որուն ետեւ, սըկիհին մէջ, կ’իջնէ ի՛նքը Աստուած,
Որուն առջեւ՝ գլխահարկ կու գայ իմ ազգըս ամբողջ
Հաղորուիլ անցեալին հաց ու գինւով կենսառողջ:

Եկեղեցին Հայկական՝ ծովուն դիմաց ալեկոծ
Նաւահանգիստ մ’է խաղաղ, ցուրտ գիշերին՝ հուր ու բոց,
Ու տռփակէզ ցերեկին անտառ մըն է ստուերոտ՝
Ուր շուշաններ կը ծաղկին Շարականի գետին մօտ:

Եկեղեցին Հայկական մէն մի քարին տակ գետնի
Դէպի երկինք բարձրացող գաղտնի ճամբայ մը ունի.
Եկեղեցին Հայկական հայ հոգիին եւ մարմնոյն
Զըրահանդերձ է փայլուն՝ մինչ իր խաչերն են դաշոյն
Եւ զանգակներն են բոմբի՛ւն, եւ երգերն է միշտ յաղթութիւն…

  
 

*Վահան Թէքէեան
Հայոց «Բանաստեղծներու Իշխան»
Ծնած է Պոլիս 1878-ին, մահացած Գահիրէի մէջ 1945-ին:
(Համառոտ կենսագրութեանը մասին կարդալ այս կայքին վրայ)