Ամենայն Հայոց Կաթողիկոսն ընդունեց
ՀՀ ԶՈՒ հոգեւոր սպասաւորներին
Մարտի 7-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում հանդիպում ունեցաւ ՀՀ ԶՈՒ Հոգեւոր Առաջնորդութեան 62 հոգեւոր սպասաւորների հետ, որոնք մէկտեղուել էին Մայր Աթոռում եռամսեայ գործունէութիւնն ամփոփելու նպատակով:
Հանդիպմանը Հայոց բանակի հոգեւոր առաջնորդ Գերաշնորհ Տ. Վրթանես եպիսկոպոս Աբրահամեանը երախտագիտութեամբ անդրադարձաւ Հայոց բանակի եւ Հոգեւոր Առաջնորդութեան հանդէպ Նորին Սրբութեան կողմից դրսեւորուող հոգատար վերաբերմունքին, ապա ներկայացրեց հոգեւոր սպասաւորների կողմից իրականացուող աշխատանքները։ Առաջնորդութեան գործունէութեան վերաբերեալ եռամսեայ զեկոյցով հանդէս եկաւ նաեւ Պաշտպանութեան բանակի աւագ գնդերեց Գոռ սարկաւագ Գիւրջեանը։
Զրոյցի ընթացքում Ամենայն Հայոց Կաթողիկոսն իր հայրական օրհնութիւնն ու պատգամը փոխանցեց բանակի գնդերեցներին եւ Վրթանես Սրբազանին՝ բարձրօրէն գնահատելով նրանց նախանձախնդիր ծառայութիւնը եւ զինուորների հետ տարուող աշխատանքը: Նորին Սրբութիւնը կարեւոր նկատեց նման հանդիպումները, որոնք առիթ են ընծայում քննութեան առնելու կատարուած աշխատանքը, միմեանց հետ կիսուելու հովուական փորձառութեամբ, նաեւ միասնաբար փնտրելու առկայ մարտահրաւէրների պատասխաններ եւ բարձրաձայնուող խնդիրների լուծումներ:
Հայոց Հովուապետը, ընդգծելով բանակում գնդերեցների ծառայութեան ներդրման կարեւորութիւնը, հաստատեց, որ նրանց առաջնային խնդիրը եւ նպատակը պէտք է լինի բանակում զինուորի համար հոգեւոր-բարոյական առողջ միջավայրի կերտումը, միջանձնային յարաբերութիւններում եղբայրասիրութեան ամրապնդումը եւ ազգային, հայրենասիրական ոգու զօրացումը։ Այս առումով Վեհափառ Հայրապետը յատկապէս շեշտեց զինուոր-գնդերեց յարաբերութիւններում վստահութեան մթնոլորտի ձեւաւորման անհրաժեշտութիւնը, ինչի շնորհիւ հնարաւոր է յաղթահարել առկայ արատաւոր երեւոյթները եւ կանխել դրանց անցանկալի, երբեմն ողբերգական հետեւանքները:
Գարեգին Երկրորդ Կաթողիկոսը նաեւ նկատեց, որ թէպէտ բանակում ծառայող հոգեւորականների առջեւ կան ծառացած բազում մարտահրաւէրներ, իւրաքանչիւր գնդերեցի համար առաջնայինն այն պատասխանատուութիւնն է, որ նա կրում է իր զօրամասում ծառայող իւրաքանչիւր զինուորի համար։ «Ձեր նպատակն ու տեսլականը պէտք է լինի զինուորի մօտ ոգու եւ գիտակցութեան կերտումը՝ հայրենասիրական ոգու, ընկերասիրութեան զգացումների եւ աստուածսիրութեան», – նշեց Ամենայն Հայոց Կաթողիկոսը՝ յորդորելով հոգեւոր սպասաւորներին մեծ պատասխանատուութեամբ ու նուիրումով մօտենալ իրենց ծառայութեանը։
Զրոյցի ընթացքում անդրադարձ կատարուեց նաեւ ՀՀ ԶՈՒ Հոգեւոր Առաջնորդութեան առջեւ ծառացած մի շարք խնդիրներին, ծառայութեան ընթացքում ծագող դժուարութիւններին եւ այլ հարցերին:
Վերջում Ամենայն Հայոց Կաթողիկոսն աղօթք բարձրացրեց առ Աստուած` հայցելով, որ Տէրն օրհնի ու զօրացնի Հայոց բանակի զինուորներին եւ գնդերեցներին իրենց նուիրեալ ծառայութեան մէջ, խաղաղ պահի հայրենի մեր երկիրը եւ անառիկ՝ նրա սահմանները։