Գերագոյն Հոգեւոր Խորհուրդն Աւարտեց Իր Աշխատանքները

Գերագոյն Հոգեւոր Խորհուրդն
Աւարտեց Իր Աշխատանքները

Հոկտեմբերի 29-ից նոյեմբերի 1-ը Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ Գերագոյն հոգեւոր խորհրդի ժողովն ընդլայնուած կազմով:
Ժողովի նիստերն ատենապետեց Արեւմտեան Եւրոպայի Հայրապետական պատուիրակ եւ Վատիկանում Ամենայն Հայոց Կաթողիկոսի ներկայացուցիչ Տ. Խաժակ արքեպիսկոպոս Պարսամեանը:
Ժողովի առաջին օրը Գերագոյն հոգեւոր խորհրդին 2020 թուականի նոյեմբերի 1-8-ը Մայր Աթոռ Սուրբ Էջմիածնում գումարուելիք Ազգային-եկեղեցական ժողովի կազմակերպման ընթացքի մասին զեկոյց ներկայացրեց ԱԵԺ կազմակերպիչ յանձնախմբի ատենապետ Տ. Արշակ եպիսկոպոս Խաչատրեանը: Տեղեկացուեց ԱԵԺ պատգամաւորների ընտրութեան, Նուիրապետական Աթոռներից, թեմերից եւ հայրապետական պատուիրակութիւններից անհրաժեշտ տուեալների հաւաքագրման եւ ժողովի օրակարգային հարցերի նախապատրաստման շուրջ կազմակերպիչ յանձնախմբի կատարած աշխատանքը: Նշուեց, որ ժողովի օրակարգի նիւթերի նախապատրաստման համար ստեղծուած եօթը յանձնախմբերն այս շրջանում կանոնաւոր գործել են եւ կատարել իրենց առաջադրանքները:
Ժողովին ներկայ Կոստանդնուպոլսի Հայոց Պատրիարքութեան պատրիարքական տեղապահ Տ. Սահակ եպիսկոպոս Մաշալեանը ԳՀԽ անդամներին տեղեկութիւններ փոխանցեց Կոստանդնուպոլսի Հայոց Պատրիարքութեան հետ առնչուած հարցերի եւ Հայոց Պատրիարքի ընտրութեան գործընթացի շուրջ:
Գերագոյն հոգեւոր խորհրդի անդամները, լսելով ներկայացուած հանգամանալի զեկոյցը, մաղթեցին, որ ընտրութիւնների գործընթացը խաղաղ ու համերաշխ մթնոլորտում աւարտին հասցուի եւ Նուիրապետական Աթոռը շարունակի իր կարեւոր եւ լիարժէք ծառայութիւնը բերել հայ ժողովրդին:
«Հայ Եկեղեցին 21-րդ դարում. ներկան եւ ապագան» խորագրի ներքոյ անցկացուելիք Ազգային-եկեղեցական ժողովի օրակարգի կանոնադրական նիւթերի նախապատրաստման ընթացքի մասին զեկուցեց Կանոնադրութիւնների մշակման յանձնախմբի ատենապետ Տ. Հովնան արքեպիսկոպոս Տէրտէրեանը:
Ժողովի երկրորդ եւ երրորդ օրը Գերագոյն հոգեւոր խորհրդի անդամները լսեցին ԱԵԺ օրակարգային նիւթերի նախապատրաստման նպատակով ստեղծուած եօթը յանձնախմբերի զեկոյցները: Կատարուած աշխատանքների մասին տեղեկութիւններ փոխանցեցին Թեմական եւ ծխական կեանքի կազմակերպման յանձնախմբի համաատենապետ Տ. Հովնան արքեպիսկոպոս Տէրտէրեանը, Հայաստանեայց Առաքելական Սուրբ Եկեղեցու կրթադաստիարակչական առաքելութեան յանձնախմբի ատենապետ Տ. Աբրահամ արքեպիսկոպոս Մկրտչեանը, Հայաստան-Սփիւռք կապերի ամրապնդման եւ ազգային ինքնութեան պահպանութեան գործում Հայաստանեայց Առաքելական Սուրբ եկեղեցու առաքելութեան յանձնախմբի ատենապետ Տ. Վազգէն եպիսկոպոս Միրզախանեանը, Քրիստոնէական արժեհամակարգին նետուած մարտահրաւէրների յանձնախմբի ատենապետ Տ. Բագրատ եպիսկոպոս Գալստանեանը, Հոգեւորականաց պատրաստութեան յանձնախմբի ատենապետ Տ. Եզնիկ արքեպիսկոպոս Պետրոսեանը, Հայաստանեայց Առաքելական Սուրբ Եկեղեցու ֆինանսատնտեսական վիճակի բարելաւման յանձնախմբի ատենապետ Տ. Մուշեղ եպիսկոպոս Բաբայեանը եւ Սոցիալական ծառայութեան յանձնախմբի ատենադպիր Տ. Մարկոս քահանայ Մանգասարեանը:
Գերագոյն հոգեւոր խորհուրդը, քննարկելով տրուած հաղորդումները եւ իր դիտարկումները յանձնելով յանձնախմբերի ուշադրութեանը, գնահատանք յայտնեց կատարուած լայնածաւալ աշխատանքի համար` թելադրելով հետեւողական կերպով շարունակել անհրաժեշտ փաստաթղթերի մշակումը:
Ժողովի ընթացքում Մայր Տաճարի հիմնանորոգութեան եւ ամրակայման աշխատանքների ընթացքի մասին զեկոյց ներկայացրեց Մայր Աթոռ Սուրբ Էջմիածնի Վարչատնտեսական բաժնի տնօրէն Տ. Մուշեղ եպիսկոպոս Բաբայեանը, անհրաժեշտ լուսաբանութիւններ տրուեցին նաեւ Ճարտարապետաշինարարական բաժնի տնօրէն Արա Վարդանեանի կողմից: Անդրադարձ կատարուեց նաեւ որմնանկարների ուսումնասիրման եւ վերականգնման խնդրին եւ տաճարի հնագիտական շերտերի հետազօտման ու պատշաճ ցուցադրման կարեւորութեանը:
Ժողովականները գոհունակութեամբ ողջունեցին համայն հայութեան Սրբութիւն սրբոցի պահպանութեանն ու բարեզարդմանն ուղղուած աշխատանքները:
Մայր Տաճարի հիմնանորոգման համար անհրաժեշտ միջոցների հանգանակութեան ընթացքի մասին ժողովականներին տեղեկութիւններ փոխանցեց յանձնախմբի ատենապետ Տ. Հովնան արքեպիսկոպոս Տէրտէրեանը: Սրբազանը ներկայացրեց հանգանակութեան կազմակերպման եւ կատարուող աշխատանքների իրազեկման նպատակով տարբեր թեմեր կատարած իր այցելութիւնների արդիւնքները, ինչպէս նաեւ ծանուցեց պատուոյ յանձնախմի ձեւաւորման եւ հանգանակութեան կազմակերպման աշխատանքային յանձնախմբի ընթացիկ գործունէութեան մասին: Տեղեկացուեց նաեւ, որ առաջիկայում հանգանակութեան մասին պատշաճ ծանուցում կը կատարուի նաեւ հայրենիքում, ինչը հնարաւորութիւն կ’ընձեռի հայրենաբնակ բարեպաշտ ժողովրդին եւս մասնակից դառնալ Մայր Տաճարի անսասանութեան ապահովման եւ պայծառազարդման սրբազան առաքելութեանը:
Գերագոյն հոգեւոր խորհուրդը գնահատանքով ողջունեց կատարուած աշխատանքները` թելադրելով պարբերաբար անհրաժեշտ լուսաբանութիւնները տալ հանրութեանը կատարուող աշխատանքների ընթացքի մասին:
Ժողովին Գերագոյն հոգեւոր խորհուրդը որոշում կայացրեց 2020 թուականին Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի գահակալութեան 20-րդ տարեդարձի տօնախմբութեան համար ստեղծել կազմակերպիչ յանձնախումբ:
Քննարկման նիւթ դարձան Հայ Եկեղեցու Համաշխարհային Երիտասարդաց Միութեան գործունէութեան զօրացման ուղիները: Գերագոյն հոգեւոր խորհուրդը ողջունեց ՀԵՀԵՄ գործունէութիւնը եւ, կարեւորելով երիտասարդութեան հետ տարուող աշխատանքները, յորդորեց Եկեղեցու առաքելութեան շրջանակներում առանձնակի ուշադրութիւն դարձնել երիտասարդութեան հոգեւոր կրթութեանն ու դաստիարակութեանը եւ դրան ուղղուած բազմաբնոյթ ծրագրերին:
Ի թիւս վերոբերեալ հարցերի անդրադարձ կատարուեց թեմական կեանքին առնչուող տարբեր հարցերին:
Գերագոյն հոգեւոր խորհրդի քառօրեայ ժողովն աւարտուեց Ամենայն Հայոց Կաթողիկոսի օրհնութեան եւ գնահատանքի խօսքով: