Գերագոյն Հոգեւոր Խորհուրդը Հանդէս Եկաւ Յայտարարութեամբ 23 2 2018

Գերագոյն Հոգեւոր Խորհուրդը
Հանդէս Եկաւ Յայտարարութեամբ

         Փետրուարի 20-23-ը Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի,  տեղի ունեցած Գերագոյն հոգեւոր խորհրդի ժողովի ընթացքում ներեկեղեցական հարցերի շարքում անդրադարձ կատարուեց Կոստանդնուպոլսի Հայոց Պատրիարքութեան կեանքում վերջին տարիների զարգացումներին եւ պատրիարքական ընտրութիւնների կազմակերպման գործընթացին։ 

        Քննարկումների արդիւնքում Գերագոյն հոգեւոր խորհուրդը հանդէս եկաւ հետեւեալ յայտարարութեամբ․

        «Գերագոյն հոգեւոր խորհուրդը կրկին իր մտահոգութիւնն է արտայայտում Կոստանդնուպոլսի Հայոց Պատրիարք Ամենապատիւ Տ. Մեսրոպ արքեպիսկոպոս Մութաֆեանի հիւանդութեան պատճառով անցնող տասը տարիների ընթացքում Պատրիարքութեան եւ պոլսահայութեան կեանքում տեղ գտած անցանկալի զարգացումների առնչութեամբ։ Պատրիարքական Աթոռի շուրջ ստեղծուած իրավիճակը լուրջ անհանգստութիւն եւ ընդվզում  է առաջ բերել աշխարհասփիւռ մեր ժողովրդի մէջ։ 

     Փաստացի թափուր Աթոռի իրողութեան եւ նոր պատրիարքական ընտրութիւններ անցկացնելու հրամայականի առջեւ 2016 թուականին Պատրիարքութեան մէջ նոր զգայունութիւններ առաջացան, որոնց փարատման համար Ամենայն Հայոց Կաթողիկոսի յորդորով Սուրբ Էջմիածին հրաւիրուած Աթոռի եպիսկոպոսաց դասը յանձնառու եղաւ յանգուցալուծման առաջնորդելու առկայ խնդիրները։ Արդիւնքում պատրիարքական տեղապահի ընտրութիւնը նոր յոյս ներշնչեց պատմական Աթոռը գահակալով օժտելու եւ պոլսահայութեան բնականոն կեանքը վերականգնելու առումով։

    Ցաւով ենք արձանագրում, որ կարճ ժամանակ անց եկեղեցական պատասխանատու մարմինների ու անհատների անշրջահայեաց քայլերի հետեւանքով ստեղծուեց մի իրավիճակ, որն առիթ տուեց արտաքին ներազդեցութիւնների եւ Թուրքիայի իշխանութիւնների միջամտութեան՝ յանգեցնելով նորանոր յուզումների եւ վերստին ձախողելով պատրիարքական ընտրութիւնների կազմակերպմանն ի նպաստ ներդրուած ջանքերը։

      Մայր Աթոռ Սուրբ Էջմիածինը մշտապէս ողջունել է պոլսահայութեան կամարտայայտութիւնը եւ իր զօրակցութիւնն է բերել Աթոռի պատկան կառոյցների կողմից առնուող որոշումներին։

     Պոլսոյ Պատրիարքութեան Կրօնական ժողովի 2018 թ. փետրուարի  9-ի որոշումը նկատի առնելով հանդերձ` սթափութեան կոչ ենք ուղղում Աթոռի միաբաններ Գերաշնորհ Տ. Գարեգին արքեպիսկոպոս Բեքչեանին, Գերաշնորհ Տ. Արամ արքեպիսկոպոս Աթեշեանին, Գերաշնորհ Տ. Սահակ եպիսկոպոս Մաշալեանին եւ մնացեալ եկեղեցականներին՝ սեփական ձգտումներից ու միջանձնային յարաբերութիւններից վեր դասելու եւ առաջնային նկատելու Կ.Պոլսոյ Աթոռի շահը՝ ամենայն իմաստութեամբ եւ յանձնառութեամբ սրբագրելու արձանագրուած սխալ գործընթացները եւ վերականգնելու խաղաղութիւնը, միասնութիւնն ու համերաշխութիւնը պոլսահայոց ալեկոծեալ կեանքում։

      Մայր Աթոռ Սուրբ Էջմիածնի յորդորն է Կրօնական ժողովի անդամներին եւ համայնքում հանգամանք ու հեղինակութիւն ունեցող աշխարհական հայորդիներին՝ միաբան ու համախորհուրդ, Հայոց Եկեղեցու կանոնների եւ օրինական պահանջների պահպանմամբ, հետամուտ լինել երկարամեայ ծանր հիւանդութեան մէջ գտնուող Ամենապատիւ Մեսրոպ Պատրիարքին անգործունեայ ճանաչելուն եւ պետութեան հետ սահմանուած ընթացակարգով պատրիարքական ընտրութիւնների կազմակերպմանը` ի պայծառութիւն Պոլսոյ Հայոց Պատրիարքութեան եւ ի մխիթարութիւն մեր բարեպաշտ ժողովրդի:

      Մեր ակնկալութիւնն է Թուրքիայի իշխանութիւններից, որ ընդառաջեն Հայոց Պատրիարքի ընտրութիւնների կազմակերպման հայ համայնքի արդար պահանջին։

     Հանդարտութեան հրաւէր ենք ուղղում նաեւ աշխարհասփիւռ մեր ժողովրդին` ողջախոհութեամբ եւ զսպուածութեամբ առիթ ընձեռելու Պոլսոյ Աթոռին յաղթահարելու ստեղծուած կացութիւնը:

 «Եւ վերջապէս, եղբայրնե՛ր, ո՛ղջ եղէք, հաստատու՛ն մնացէք, մխիթարուեցէ՛ք, միաբա՛ն եղէք, խաղաղութիւ՛ն արէք. եւ խաղաղութեան ու սիրոյ Աստուածը թող լինի ձեզ հետ» (Բ Կորնթ. ԺԳ 11)»։