Մայր Աթոռ Ս. Էջմիածնի մէջ ընդհանուր համաձայնութիւն Կ.Պոլսոյ Պատրիարքութեան առկայ հարցերուն շուրջ

Մայր Աթոռ Ս. Էջմիածնի մէջ
ընդհանուր համաձայնութիւն ձեռք բերուեցաւ
Կ.Պոլսոյ Պատրիարքութեան առկայ հարցերուն շուրջ

     Փետրուարի 23-24-ին, Մայր Աթոռ Ս. Էջմիածնում, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցան հանդիպումներ, որոնց մասնակցում էին Հայոց Հովուապետի հրաւէրով Մայր Աթոռ ժամանած Կոստանդնուպոլսի Հայոց Պատրիարքութեան երեք միաբան եպիսկոպոսներ` Պատրիարքական ընդհանուր փոխանորդ Գերաշնորհ Տ. Արամ արքեպիսկոպոս Աթեշեանը, Գերմանիայի հայոց թեմի առաջնորդ Գերաշնորհ Տ. Գարեգին արքեպիսկոպոս Բեքչեանը եւ Պատրիարքութեան Կրօնական ժողովի ատենապետ Գերաշնորհ Տ. Սահակ եպիսկոպոս Մաշալեանը:

     Փետրուարի 23-ի հանդիպումից առաջ, գլխաւորութեամբ Ամենայն Հայոց Կաթողիկոսի, Գարեգին, Արամ եւ Սահակ Սրբազաններն այցելեցին Մայր Տաճար, ուր Իջման Ս. Սեղանի առջեւ միասնական աղօթք կատարեցին` Կ.Պոլսի դարաւոր Պատրիարքական Աթոռի պայծառութեան, առկայ մարտահրաւէրների յաղթահարման եւ պոլսահայ համայնքում խաղաղութեան ու համերաշխութեան վերահաստատման համար: Աղօթք բարձրացուեց առ Աստուած նաեւ Աթոռի հանգստեան կոչուած գահակալ Ամենապատիւ Տ. Մեսրոպ արքեպիսկոպոս Մութաֆեանի համար, ով Ս. Փրկիչ ազգային հիւանդանոցում շարունակում է մնալ մշտական խնամքի տակ:     

         Երկօրեայ քննարկումների ընթացքում անդրադարձ եղաւ Կոստանդնուպոլսի Հայոց Պատրիարքութեան կեանքում վերջին օրերին տեղ գտած իրադարձութիւններին, պատրիարքական ընտրութիւնների կազմակերպման գործընթացի շուրջ առաջացած յուզումներին ու տարակարծութիւններին:

      Ամենայն Հայոց Կաթողիկոսը Սրբազան Հայրերին յորդորեց Պատրիարքական Աթոռի գերագոյն շահի գիտակցութեամբ` ամենայն ջանք ի գործ դնել հոգեւորականաց միջեւ եւ պոլսահայութեան կեանքում փոխըմբռնման, հաշտութեան ու եղբայրասիրութեան ոգու ամրա-պընդման համար: Նորին Սրբութեան թելադրութիւնն էր փոխհասկացողութեամբ եւ Հայաստանեայց Առաքելական Ս. Եկեղեցու կանոնների ու Կոստանդնուպոլսի Հայոց Պատրիարքութեան կողմից որդեգրուած կանոնական եւ աւանդական ընթացակարգերի պահպանութեամբ լուծման առաջնորդել Պատրիարքական ընտրութիւնների ողջ գործընթացը:

     Ստեղծուած իրավիճակի եւ դրա հանգուցալուծման ուղիների վերաբերեալ Սրբազան Հայրերի կողմից Ամենայն Հայոց Կաթողիկոսին տրուեցին անհրաժեշտ լուսաբանութիւններ, ներկայացուած տեսակէտների շուրջ տեղի ունեցան քննարկումներ: Կոստանդնուպոլսի Հայոց Պատրիարքութեան միաբանները նաեւ առանձնաբար քննարկեցին Պատրիարքութեան առջեւ ծառացած մարտահրաւէրները:

      Տեղի ունեցած հանդիպումների եւ քննարկումների արդիւնքում ձեռք բերուեց հետեւեալ ընդհանուր համաձայնութիւնը.
– Պատրիարքութեան Կրօնական ժողովի հրաւէրով Եկեղեցական համագումար ժողովը մինչեւ ս. թ. մարտի 15-ը կատարում է տեղապահի ընտրութիւնը: Տեղապահի ընտրութեամբ, ըստ Եկեղեցու կանոնակարգի, դադարեցւում են Պատրիարքական ընդհանուր փոխանորդի լիազօրութիւնները,
– Աթոռի միաբան եպիսկոպոսները հաւասար իրաւունք ունեն առաջադրելու իրենց թեկնածութիւնը տեղապահի ընտրութիւններին,
– Տեղապահի ընտրութիւնից յետոյ Կրօնական ժողովը ստեղծում է եկեղեցականներից եւ աշխարհականներից կազմուած յանձնաժողով` օրէնքով սահմանուած կարգով Պատրիարքական ընդհանուր փոխանորդից ընտրուած տեղապահին յանձնում-ընդունումը կազմակերպելու համար,
– Տեղապահի ընտրութիւնից յետոյ տասնօրեայ ժամկէտում կազմակերպւում են Նախաձեռնարկ մարմնի ընտրութիւնները` Պատրիարքութեան ընկալեալ ընթացակարգերի համաձայն: Նախաձեռնարկ մարմինը, իր հերթին, վեց ամսուայ ընթացքում, տեղապահի գլխաւորութեամբ, կազմակերպում է Կոստանդնուպոլսի Հայոց Պատրիարքի ընտրութիւնը` ըստ գործող ընթացակարգերի,
– Նախաձեռնարկ մարմինը ամենամսեայ հաշուետուութիւն է ներկայացնում Կրօնական ժողովին եւ հանրութեանը` ընտրութիւնների կազմակերպման ուղղութեամբ կատարուած աշխատանքների վերաբերեալ,
– Պատրիարքական ընտրութիւնները` վեցամսեայ ժամկէտում տեղի չունենալու պարագայում, Կրօնական ժողովի հրաւէրով Պատրիարքութեան Եկեղեցական համագումար ժողովը եւ համայնքային հաստատութիւնների ատենապետերի ժողովը իրենց վերապահուած լիազօրութիւնների շրջանակում դնում են տեղապահի եւ Նախաձեռնարկ մարմնի վստահութեան քուէի հարցը,
– Նախաձեռնարկ մարմինը ընտրական շրջանում հաւասար պայմաններ է ապահովում պատրիարքական թեկնածուներին` իրենց ընտրական քարոզչութիւնը իրականացնելու համար:

        Փետրուարի 24-ին, գլխաւորութեամբ Ամենայն Հայոց Կաթողիկոսի, Տ. Արամ արքեպիսկոպոս Աթեշեանը, Տ. Գարեգին արքեպիսկոպոս Բեքչեանը եւ Տ. Սահակ եպիսկոպոս Մաշալեանը հանդիպում ունեցան Գերագոյն հոգեւոր խորհրդի անդամ եպիսկոպոսների հետ: Հանդիպմանը հրաւիրուած էր նաեւ Գուգարաց թեմի առաջնորդ Գերաշնորհ Տ. Սեպուհ արքեպիսկոպոս Չուլջեանը, իբրեւ պատրիարքական թեկնածուներից մէկը:

       Ժողովի աւարտին Ամենայն Հայոց Կաթողիկոսն իր գնահատանքը փոխանցեց Կ.Պոլսի միաբան եպիսկոպոսներին` երկօրեայ ժողովների ընթացքում դրսեւորած յանձնառութեան համար` եղբայրական ոգով եւ նախանձախնդրութեամբ Պատրիարքութեան եւ պոլսահայութեան կեանքում ստեղծուած իրավիճակի յաղթահարմանն ուղղուած ջանքերի համար:

          Նորին Սրբութիւնն իր սերն ու օրհնութիւնը փոխանցեց Պատրիարքութեան ուխտապահ եկեղեցականաց դասին եւ հաւատաւոր ժողովրդին` մաղթելով Մեծի պահոց նուիրական շրջանին ընդառաջ Աստծու զօրակցութիւնն իրենց հաւատի արթնութեան եւ ազգային-եկեղեցական կեանքի շինութեան համար: