Կաթողիկէ Սուրբ Էջմիածնի տօնին օծուեց եւ
վերատեղադրուեց Մայր տաճարի գմբէթի խաչը
«Աստուածահաստատ Սուրբ Էջմիածինը Աստուծոյ պարգեւն է մեր ժողովուրդին Իր Միածին Որդու Էջքով»․ Ամենայն Հայոց Կաթողիկոս
Յունիսի 14-ին Հայաստանեայց Առաքելական Սուրբ Եկեղեցին նշեց Արարատեան տօների շաբաթը պսակող Կաթողիկէ Սուրբ Էջմիածնի տօնը:
Տօնի առիթով Մայր Աթոռ Սուրբ էջմիածնում Սուրբ Պատարագ մատուցուեց Սուրբ Տրդատ Գ հայոց արքայի անունը կրող բաց խորանին։ Պատարագիչն էր Մայր Աթոռի Եկեղեցական հայեցակարգային հարցերի գրասենեակի տնօրէն Գերաշնորհ Տ. Վազգէն եպիսկոպոս Միրզախանեանը, ով իր քարոզում անդրադարձ կատարեց Միածնաէջ Մայր տաճարի հիմնադրման խորհրդին եւ կարեւոր նշանակութեանն ու առաքելութեանը հայ ժողովրդի կեանքում։
Տօնի բերկրանքը հաւելուեց մէկ այլ նշանակալի իրադարձութեամբ։ Նկատի առնելով, որ Միածնաէջ Մայր տաճարի ամրակայման աշխատանքների հերթական փուլի աւարտի արդիւնքում ամբողջութեամբ հիմնանորոգուել էր տաճարի գմբէթը, Սուրբ Պատարագի աւարտին կատարուեց տաճարի գմբէթի նորակերտ խաչի օծման
արարողութիւնը։ Տաճարի հին խաչը, որը վնասուել էր ժամանակների ներգործութեան պատճառով, իր մշտական հանգրուանը կը գտնի Մայր Աթոռի թանգարանում։
Բաց խորանի առջեւ, ըստ ընկալեալ կարգի, նախ սաղմոսների ներքոյ գինով եւ ջրով լուացուեց խաչը, ապա սուրբգրային ընթերցուածքներից ու աղօթքներից յետոյ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը սրբալոյս միւռոնով օծեց այն։
Տօնի առիթով, հանդիսապետութեամբ Ամենայն Հայոց Կաթողիկոսի, նաեւ կատարուեց Սուրբ Էջմիածնի մաղթանք:
Հոգեւոր դասը եւ ներկայ բարեպաշտ հայորդիները միասնաբար աղօթք բարձրացրեցին առ Բարձրեալն Աստուած Հայոց Ընդհանրական Մայր Աթոռի՝ Սուրբ Էջմիածնի անսասանութեան ու պայծառութեան, աշխարհասփիւռ հայ ժողովրդի կեանքում նրա սրբազան առաքելութեան յարատեւ իրականացման համար։
Այնուհետեւ նորաօծ խաչի առջեւ Նորին Սրբութիւն Գարեգին Երկրորդ Կաթողիկոսն իր պատգամն ուղղեց ներկաներին եւ համայն մեր ժողովրդին Կաթողիկէ Սուրբ Էջմիածնի տօնի եւ Մայր տաճարի գմբէթի խաչի օծման ուրախալի առիթով։
Ամենայն Հայոց Կաթողիկոսի խօսքի աւարտին ծաղիկներով զարդարեալ օծուած խաչը հանդիսաւոր թափօրով տարուեց Մայր տաճարի առջեւ, որտեղից ներկաների գոհաբանական մաղթանքների եւ շարականների երգեցողութեան ներքոյ կռունկով բարձրացուեց եւ տեղադրուեց տաճարի գմբէթին։
Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ
ՊԱՏԳԱՄԸ ԿԱԹՈՂԻԿԷ ՍՈՒՐԲ ԷՋՄԻԱԾՆԻ ՏՕՆԻՆ
«Գոհանամք զՔէն, Հայր ամենակալ, որ պատրաստեցեր
մեզ նաւահանգիստ Սուրբ զԵկեղեցի, տաճար սրբութեան,
ուր փառաբանի Սուրբ Երրորդութիւնդ» (Պատարագամատոյց)
Սիրելի հաւատաւոր զաւակներ Մեր,
Այսօր Կաթողիկէ Սուրբ Էջմիածնի հիմնադրութեան յիշատակի օրն է։ Այս նշանակալի տօնի բերկրանքը մեր սրտերում սրբալոյս միւռոնով օծեցինք նորակերտ այս խաչը, որը քիչ յետոյ, միասնական գոհաբանութեամբ ու փառաբանութեամբ առ Աստուած, պիտի վերատեղադրուի համայն հայութեան Սրբութիւն Սրբոց աստուածակառոյց Սուրբ Էջմիածնի Մայր տաճարի գմբէթին։ «Գոհութիւն ենք յայտնում Քեզ, Հայր Ամենակալ, որ պատրաստեցիր մեզ համար որպէս նաւահանգիստ Սուրբ Եկեղեցին, տաճարը սրբութեան, որտեղ փառաբանւում է Սուրբ Երրորդութիւնդ»։
Աստուածահաստատ Սուրբ Էջմիածինը Աստծոյ պարգեւն է մեր ժողովրդին Իր Միածին Որդու Էջքով՝ որպէս Երկնաւորի անհուն սիրոյ վկայութիւն հանդէպ մեր ժողովուրդը։ Մարդկութեան Փրկիչը իջաւ հայոց աշխարհ` ի տես Սուրբ Գրիգոր Լուսաւորչի, եւ ցոյց տուեց հայոց սրբազնասուրբ Մայր տաճարի կառուցման վայրը։ Բիբլիական Արարատի դիմաց վեր յառնեց հայոց աստուածաշնորհ տաճարը՝ Լուսաւորիչ Հայրապետի, Հայոց Տրդատ արքայի եւ հաւատացեալ ժողովրդի ջանքերով։ Սուրբ Էջմիածինը դարեր շարունակ եղաւ եւ այսօր էլ է ու միշտ պիտի լինի այն ամուր վէմը, որի վրայ խարսխուած է հայոց հաւատքը, որով կերտուել է հայոց ինքնութիւնն ու վերակերտուել հայոց պետականութիւնը։ Արդարեւ, Էջմիածինն է մեր ժողովրդին ազգային արժէքներով միաբան պահպանել եւ առաջնորդել դէպի հայրենի անկախութեան նոր հորիզոններ։ Ք
րիստոսահիմն ոսկեխարիսխ Սուրբ Էջմիածինը այն նաւահանգիստն է, որտեղ դարերի արհաւիրքներից ու ալեկոծութիւններից խաղաղութիւն է գտել հաւատաւոր մեր ժողովուրդը, յոյսով առատացել, յաղթանակի նոր ուժ ու զօրութիւն առել։ Այստեղ է Աւարայրի, Սարդարապատի, արցախեան ազատամարտերի յաղթութեան ոգին զօրացել, այստեղ են Հայոց ցեղասպանութիւնից մազապուրծ բազում գաղթական հայորդիք օգնութիւն ստացել, մխիթարութեամբ սփոփուել եւ նոր կեանքի աւիշով լցուել։ Էջմիածնի Մայր տաճարը Տիրոջ դրոշմն է հայոց հողում, հայոց կեանքում եւ հայոց հոգիներում, որի երկնառաք անմար լոյսը ճառագում է աշխարհասփիւռ մեր բոլոր եկեղեցիներից։ Այն թանկագին մարգարիտ է, որը միշտ պիտի շողայ որպէս հոգեւոր գանձ մեր բարեպաշտ ժողովրդի հաւատքի անդաստանում: «Ուրա՛խ եղիր, Սուրբ Եկեղեցի, քանզի Քրիստոս՝ Արքան երկնից, քեզ պսակեց Իր խաչով»:
Սիրելիներ, էջմիածնանուէր ու եկեղեցասէր մեր բարերարների սրտաբուխ նուիրատուութիւններով, աշխարհասփիւռ Մեր զաւակների ազնիւ յանձնառութիւններով վերանորոգուող Մայր տաճարն այսօր պայծառանում է սուրբ խաչի պսակումով։ Մենք հաւատում ենք, որ Սուրբ Էջմիածնի տաճարի բարձունքից ճառագող Տիրոջ Սուրբ Խաչի զօրութիւնը պիտի պարգեւի մեր ժողովրդին ուժ ու կորով՝ վեր յառնելու դժուարութիւններից, յաղթահարելու համաւարակի փորձութիւնը եւ նոր օրհնութիւններով ու ձեռքբերումներով շարունակելու իր ստեղծարար կեանքը։ Խաչը նշան է դժուարութիւնների ու փորձութիւնների դիմագրաւումով յաղթութեան, խաչը առհաւատչեան է մեր միաբանութեան ամրապնդման, խաչը Քրիստոսի ներկայութիւնն է մեր մէջ եւ խաչով Փրկիչը զօրակից է ու ապաւէն աստուածասէր ազգիս հայոց: Մենք այսօր խաչապսակ Սուրբ Էջմիածնի Մայր տաճարով, մեր Սուրբ Եկեղեցիով այդ զօրութեան, այդ յաղթութեան կրողներն ենք։ Չթերանանք ու չտկարանանք Միածնաէջ մեր անգին սրբավայրի հանդէպ մեր սէրն ու նուիրուածութիւնը արտայայտելու մէջ, քանզի մեր բարեպաշտ հայրերի շուրթերով օրհնուած են բոլորը, ովքեր բարի յիշատակ ունեն Սուրբ Էջմիածնում։ Լինենք միաւորուած ու համերաշխ՝ մեր հայրենիքի հզօրացման, մեր ազգային երազանքների իրականացման, մեր լուսաւոր գալիքը կերտելու համար:
Հոգենորոգ այս առիթով վերստին Հայրական Մեր սէրն ու Հայրապետական բարձր գնահատանքն ենք բերում մեր բոլոր երախտարժան բարերարներին, ովքեր սրտաբուխ նուիրատուութիւններով վկայում են մեր Սուրբ Եկեղեցու եւ Սուրբ Էջմիածնի հանդէպ իրենց որդիական ջերմ սէրը: Մայր տաճարի նորոգութիւնը հոգեւոր ուրախութիւն ու մխիթարութիւն է ինչպէս հայրենաբնակ հայորդիների, այնպէս էլ սփիւռքի Մեր զաւակների համար։ Հայրապետական օրհնութեամբ բարձրօրէն գնահատում ենք Մեր բոլոր զաւակների զոհողութիւնն ու ազնիւ մասնակցութիւնը հայոց հոգեւոր կենտրոնի, Քրիստոսաէջ Մայր տաճարի հիմնանորոգման ու պայծառազարդման աստուածահաճոյ գործում։ Մեր բարձր գնահատանքն ենք բերում հանգանակութեան յանձնախմբի անդամներին, Մայր Աթոռի Ճարտարապետական խորհրդին եւ Ճարտարապետական բաժնի աշխատակիցներին, «Հորիզոն 95» շինարարական կազմակերպութեանը, բոլոր վարպետներին, շինարարներին ու մասնագէտներին, ովքեր շարունակում են ջանասիրաբար աշխատել՝ օր առաջ մեր սրբազան աղօթավայրի դռները բացելու հաւատաւոր ժողովրդի առջեւ։ Հիմնանորոգման աշխատանքները, որ կը տեւեն շուրջ մէկ եւ կէս տարի, վստահ ենք, յաջողութեամբ պիտի աւարտուեն, եւ շուքով նորոգուած ու գեղեցկազարդ մեր սրբազան աղօթավայրի կամարների ներքոյ պիտի շարունակուեն աստուածային օրհնութիւններ ու շնորհներ բաշխուել հաւատաւոր Մեր ժողովրդին եւ բոլոր ուխտաւորներին։ Համազգային մասնակցութեամբ Մայր տաճարի նորոգութիւնը Մեր հաւատաւոր զաւակների միասնականութեան, մեր սրբութիւնների ու արժէքների շուրջ համախմբուածութեան վկայութիւններից է:
Սիրելիներ, այս տօնական օրը վերստին հայցենք Բարձրեալն Աստծոյ զօրակցութիւնը, որ շուտափոյթ յաղթահարենք համաւարակի ճգնաժամը եւ սիրով ու համերաշխութեամբ ընթանանք դէպի ազգային-եկեղեցական կեանքի նոր առաջընթաց: Աղօթենք, որ Աստուած խաղաղութիւն ու շինութիւն շնորհի աշխարհին, բարօրութիւն, ապահովութիւն պարգեւի մեր հայրենիքին եւ իր երկնառաք բիւր օրհնութիւններն ու զօրակցութիւնը համայն մեր ժողովրդին: Շարականագրի «Եկայք շինեսցուք սուրբ զխորանն լուսոյ» կոչին համահունչ՝ համայն ազգիս ջանքերով, անկախ պետականութեան հովանու ներքոյ թող միշտ շէն լինի Մայր Աթոռը, յաւէտ շողարձակի լոյսը Սուրբ Էջմիածնի, եւ պայծառ ու անսասան մնա քրիստոսահիմն Մայր տաճարը՝ ի վայելումն ազգիս հայոց եւ ի փառս Ամենասուրբ Երրորդութեան. ամէն: