Արեւագալ / Arewakal / Sonnenaufgangshymne

 

Sonnenaufgangshymne / Arewakal

 
Յարեւելից մինչ ի մուտս
(Harevelitz)
(Pfr. Shnork Tchekidjian)
 
 
 
Ճգնաւորք
(Djeknawork)
(Pfr. Shnork Tchekidjian)
 
 
 
Լոյս, արարիչ լուսոյ
(Loujs, araritsch louso)
(Pfr. Shnork Tchekidjian)
 
 
 
Անեղանելիդ
(Aneghaneleet)
(Pfr. Shnork Tchekidjian)
 
 
Ճանապարհ եւ Ճշմարտութիւն
(Janabarh yew djischmardoutjoun) (I.)
(Pfr. Shnork Tchekidjian)
  
 
Ճանապարհ բարի Քրիստոս
(Janabarh Pari Krisdos) (II.)
(Pfr. Shnork Tchekidjian)
 
 
   
Khatch Neuchatel Cornaux
 

ԱՐԵՒԱԳԱԼԻ ԺԱՄ

ՏԷՐՈՒՆԱԿԱՆ ԱՂՕԹՔ

Քահանան:  Օրհնեալ Տէր մեր Յիսուս Քրիստոս. ամէն:

Հայր մեր որ յերկինս ես. սուրբ եղիցի անուն քո: Եկեսցէ արքայութիւն քո. եղիցին կամք քո որպէս յերկինս եւ յերկրի: Զհաց մեր հանապազորդ տուր մեզ այսօր: Եւ թող մեզ զպարտիս մեր, որպէս եւ մեք թողումք մերոց պարտապանաց: Եւ մի տանիր զմեզ ի փորձութիւն. այլ փրկեա զմեզ ի չարէ: Զի քո է արքայութիւն եւ զօրութիւն եւ փառք յաւիտեանս. ամէն:

ՍԱՂՄՈՍ

Քահանան: Եղիցի անուն Տեառն օրհնեալ յաւիտեան. զի յառաջ քան զարեւ է անուն նորա:

ՍԱՂՄՈՍ

Սարկաւագը: Ի նա օրհնեսցին ամենայն ազգք երկրի, եւ ամենայն ազինք երանիցեն նմա: Օրհնեալ Տէր Աստուած Իսրայելի, որ առնէ սքանչելիս միայն. եւ օրհնեալ է անուն սուրբ փառաց նորա յաւիտեան. լցցի փառօք նորա ամենայն երկիր. եղիցի եղիցի:

ՓԱՌԱԲԱՆՈՒԹԻՒՆ ԵՒ ՕՐՀՆՈՒԹԻՒՆ

Քահանան: Փառք Հօր եւ Որդւոյ եւ Հոգւոյն Սրբոյ:

Սարկաւագը: Այժմ եւ միշտ եւ յաւիտեանս յաւիտենից. ամէն: Եւ եւս խաղաղութեան զՏէր աղաչեսցուք, ընկալ կեցո եւ ողորմեա:

Քահանան: Օրհնութիւն եւ փառք Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. ամէն:

ԵՐԳ

Յարեւելից մինչ ի մուտս. ի հիւսիսոյ եւ ի հարաւոյ. ամենայն ազգք եւ ազինք, յօրհնութիւն նոր օրհնեցէք զարարիչն արարածոց, որ ծագեաց զլոյս արեգականն այսօր յաշխարհս:

Եկեղեցիք արդարոց. փառաբանիչք Ամենասուրբ Երրորդութեանն. յառաւօտս լուսոյ զառաւօտ խաղաղութեան Քրիստոս գովեցէք ընդ Հօր եւ Հոգւոյն, որ ծագեաց զլոյս գիտութեանն իւրոյ ի մեզ:

ՅՈՐԴՈՐԱԿ

Յարեւելից յարեւմուտս մանկունք Սիոնի. օրհնեցէք միշտ անդադար զծագողն լուսոյ:

Եկեղեցիք արդարոց եւ փառաբանիչք. բարեբանեցէք որ ետ զիմաստս լուսոյ:

 ՔԱՐՈԶ

Սարկաւագն: Յարեւելից մինչեւ ի մուտս արեւու ընդ ամենայն տեղիս քրիստոնէութեան, ուր եւ կարդան զանուն Տեառն սրբութեամբ, Տէր աղօթիւք նոցա եւ բարեխօսութեամբն մեզ ողորմեսցի: Ուխտիւք զԱստուած աղաչեսցուք, զի նա փրկեսցէ զմեզ ի մեղաց եւ ի ցանկութենէ աշխարհի: Ընկալցի զուխտս եւ զխնդրուածս սրտից մերոց. եւ արժանի արասցէ զմեզ հաւատոց եւ պատուիրանաց իւրոց ընդ ամենայն սուրբս իւր: Ամենակալ Տէր Աստուած մեր կեցո եւ ողորմեա:

Քահանայն: Կեցո Տէր եւ ողորմեա:

Սարկաւագը: Զառաւօտս լուսոյ եւ զառաջիկայ օրս խաղաղութեամբ անցուցանել հաւատով ի Տեառնէ խնդրեսցուք:

Քահանան: Շնորհեա Տէր:

Սարկաւագը: Զհրեշտակ խաղաղութեան պահապան անձանց մերոց ի Տեառնէ խնդրեսցուք:

Քահանան: Շնորհեա Տէր:

Սարկաւագը: Զքաւութիւն եւ զթողութիւն յանցանաց մերոց ի Տեառնէ խնդրեսցուք:

Քահանան: Շնորհեա Տէր:

Սարկաւագը: Զսրբոյ խաչին մեծ եւ կարող զօրութիւնն անձանց մերոց, ի Տեառնէ խնդրեսցուք:

Քահանան: Շնորհեա Տէր:

Սարկաւագը: Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:

Քահանան: Տէր ողորմեա:

Սարկաւագը: Զանձինս մեր եւ զմիմեանս Տեառն Աստուծոյ ամենակալին յանձն արասցուք:

Քահանան: Քեզ Տեառնդ յանձն եղիցուք:

Սարկաւագը: Ողորմեաց մեզ, Տէր Աստուած մեր, ըստ մեծի ողորմութեան քում, ասասցուք ամենեքեան միաբանութեամբ.

Քահանան: Տէր ողորմեա. Տէր ողորմեա. Տէր ողորմեա:

ԱՂՕԹՔ

Քահանան: Յարեւելից մինչեւ ի մուտս արեւու օրհնեալ ես, Տէր. վասն զի թագաւոր քաղցր ես. եւ անուն քո ահեղ է ընդ ամենայն տիեզերս:

Քաղցրասցին սաղմոսերգութիւնք մեր առաջի քոյ. ելցեն իրաւունք յարդարութենէ քումմէ ի տկարութիւնս մեր, եւ փառաւորեսցի ամենասուրբ անուն քո: Եւ մեք արժանի եղիցուք կալ ի պատուիրանի քում. եւ քեզ երգել զօրհնութիւն եւ զփառս Հօր եւ Որդւոյ եւ Հոգւոյն Սրբոյ. այժմ եւ միշտ եւ յաւիտեանս յաւիտենից. ամէն:

Խաղաղութիւն ամենեցուն.

Դպիրքն: Եւ ընդ հոգւոյդ քում.

Քահանան: Աստուծոյ երկիրպագեսցուք.

Դպիրքն: Առաջի քո, Տէր.

Քահանան: Աստուած մշտնջենաւոր, Աստուած յաւիտենական, որ ի ստորին աշխարհս լոյս ծագեցար, եւ լուսաւորեցեր զմեզ ի խաւարային մեղաց մերոց: Որ վասն մեր ի չափաւորութիւն եկիր, անչափդ Աստուծոյ. եւ հեղեալ ծաւալեցեր զշնորհս Հոգւոյդ Սրբոյ յարարածս քո: Այժմ եւ յաւիտեանս ժամանակաց բարեբանեալ ես, Ամենամեծդ Աստուած, ընդ Հօր եւ Ամենասուրբ Հոգւոյդ. այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ

Դպիրքն:

Աղաղակեցէք առ Տէր ամենայն երկիր, ծառայեցէք Տեառն ուրախութեամբ:

Մտէք առաջի նորա ցնծութեամբ, ծաներուք զի նա է Տէր Աստուած մեր:

Փառք Հօր եւ Որդւոյ եւ Հոգւոյն Սրբոյ.

Այժմ եւ միշտ եւ յաւիտեանս յաւիտենից. ամէն:

ԵՐԳ

Ճգնաւորք Աստուծոյ, եւ ժառանգորդք երկնից արքայութեանն. որք փոխանակեալք զանցաւորս առիք զանանցն բարութիւնսն. բարեխօսեցէք առ Տէր վասն մանկանց եկեղեցւոյ:

Նահատակք պանծալիք եւ սիրեցեալք ի յերկնաւոր Հօրէն. որք մկրտեցայք ընդ Քրիստոսի արեամբ ձերով ի մահ խաչին. բարեխօսեցէք առ Տէր վասն մանկանց եկեղեցւոյ:

Մարտիրոսք ցանկալիք, եւ օթեւանք Հոգւոյն ճշմարտութեանն. որք յաղթեցիք հոգւով կարեաց եւ ցանկութեան. բարեխօսեցէք առ Տէր վասն մանկանց եկեղեցւոյ:

Գովելիք աշխարհի, եւ բաղձալիք վերնոցն պետութեանց. որք երանութեան մասին հասիք քան զամենայն որդիս մարդկան. բարեխօսեցէք առ Տէր վասն մանկանց եկեղեցւոյ:

Կամաւոր պատարագք, մանկունք տիօք եւ կատարեալք իմաստութեամբ. որք փոխանակ կաթին արբիք զգինին զմայլեցուցիչ. բարեխօսեցէք առ Տէր վասն մանկանց եկեղեցւոյ:

ՅՈՐԴՈՐԱԿ

Ճգնաւորք ճշմարիտք վկայք Քրիստոսի. բարեխօսեցէք առ Տէր վասն անձանց մերոց:

Նահատակք կենդանիք սիրողք Քրիստոսի. որք չարչարեցայք մարմնով վասն անուանն Տեառն:

Մարտիրոսք ցանկալիք մարդկան ըղձալիք. հայցեցէք ի Սուրբ Հոգւոյն տալ մեզ զբարիս:

Գովելիք վերնոց դասուց. պարծանք աշխարհի. խնդրեցէք զխաղաղութիւն տալ եկեղեցւոյ:

Կամաւոր սուրբ պատարագք հասակաւ մանկունք. հայցեցէք լինիլ եւ մեզ ձեզ պսակակից:

ՄԱՂԹԱՆՔ

Քահանան: Աղաչեմք ողորմեաց, Տէր բարերար, աղաչեմք ողորմեաց. վասն աղօթից սրբոց ճգնաւորացն աղաչեմք ողորմեաց:

ՔԱՐՈԶ

Սարկաւագը: Սուրբ ճգնաւորօքն աղաչեսցուք զՏէր, որք զչարսն պարտեցին, նեղութեանցն համբերեցին, լուսեղէն եւ երկնային անթառամ պսակացն արժանի եղեն: Աղօթիւք նոցա եւ բարեխօսութեամբ մեզ ողորմեսցի: Ամենակալ Տէր Աստուած մեր. կեցո եւ ողորմեա:

ԱՂՕԹՔ

Քահանան: Սուրբ ես Տէր, եւ ի սուրբս հանգուցեալ. եւ մեք սուրբ վկայիւքս աղաչեմք զքեզ. բարեխօսութեամբ սուրբ Աստուածածնին եւ աղաչանօք ամենայն սրբոց քոց. մի մերժեր զմեզ յողորմութենէ քումմէ, այլ կեցո զմեզ աղօթիւք սոցին. զի դու ես բազումողորմ Աստուած. եւ քեզ վայելէ փառք իշխանութիւն եւ պատիւ. այժմ եւ միշտ եւ յաւիտեանս. յաւիտենից. ամէն:

ՔԱՐՈԶ

Սարկաւագը: Յիշեա Տէր զպաշտօնեայս քո, զծնողսն մեր, զվարդապետս, զեղբարս, զընկերս, զկերակրիչս, զուխտաւորս, զճանապարհորդս, զհանգուցիչս, զվաստակաւորս, զխոստովանողս, զապաշխարողս, զգերիս, զհիւանդս, զնեղեալս, զիշխանս, զչարարարս, զբարերարս, զթշնամիս, զատելիս, եւ որք պատուիրեցին մեզ հաւատով:

ԱՂՕԹՔ

Քահանան: Յիշեա Տէր եւ ողորմեա:

Բարերար եւ բազումողորմ Աստուած, քո անմոռաց գիտութեամբդ եւ անբաւ մարդասիրութեամբդ յիշեա զամենայն հաւատացեալս ի քեզ եւ ողորմեա ամենեցուն: Օգնեա եւ փրկեա յիւրաքանչիւր վտանգից եւ փորձութեանց: Արժանաւորեա գոհութեամբ փառաւորել զՀայր եւ զՈրդի եւ զՍուրբ Հոգիդ. այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ

Դպիրքն:

Աստուած, Աստուած իմ, ես առ քեզ առաւօտ առնեմ. ծարաւեաց առ քեզ հոգի իմ, քանիպատիկ եւս եւ մարմին իմ:

Որպէս երկիր անապատ եւ անջուր, ուր ոչ գոյ ի նմա ճանապարհ:

Փառք Հօր եւ Որդւոյ եւ Հոգւոյն Սրբոյ.

Այժմ եւ միշտ եւ յաւիտեանս յաւիտենից. ամէն:

ԵՐԳ

Լոյս, արարիչ լուսոյ, առաջին լոյս. բնակեալդ ի լոյս յանմատոյց, Հայր երկնաւոր, ի դասուց լուսեղինացն օրհնեալ. ի ծագել լուսոյ առաւօտուս, ծագեա ի հոգիս մեր զլոյս քո իմանալի:

Լոյս, ի լուսոյ ծագումն, արեգակն արդար. անճառ ծնունդ Հօր Որդի. յառաջ քան զարեւ անուն քո գովեալ ընդ Հօր. ի ծագել լուսոյ առաւօտուս, ծագեա ի հոգիս մեր զլոյս քո իմանալի:

Լոյս, ի Հօրէ բղխումն, աղբիւր բարութեան, Հոգիդ Սուրբ Աստուծոյ. մանկունք եկեղեցւոյ ընդ հրեշտակս զքեզ բարեբանեն. ի ծագել լուսոյ առաւօտուս, ծագեա ի հոգիս մեր զլոյս քո իմանալի:

Լոյս, երրեակ եւ մի անբաժանելի Սուրբ Երրորդութիւն, զքեզ ընդ երկնայնոցն երկրածինքս միշտ փառաւորեմք. ի ծագել լուսոյ առաւօտուս, ծագեա ի հոգիս մեր զլոյս քո իմանալի:

ՅՈՐԴՈՐԱԿ

Անեղանելիդ Աստուած, Հայր ամենակալ. ընկալ զաղաչանս մեր քոց պաշտօնէից:

Ի Հօրէ ծագումն անճառ, արեգակն արդար. ծագեա ի յանձինս մեր զլոյսդ ողորմութեան:

Ի Հօրէ բղխեալ Հոգի, աղբիւր բարութեան. լուսով քով լցո զմեզ յայսմ առաւօտուս:

Երեք անձինք եւ մի բնութիւն, մի աստուածութիւն, զքեզ խոստովանիմք յաւէտ Սուրբ Երրորդութիւն:

ՄԱՂԹԱՆՔ

Քահանան: Լուսովդ քո, Քրիստոս, ամենեքեան լուսաւորեցաք, եւ ի սուրբ խաչ քո, Փրկիչ, հաւատացեալքս ապաւինեցաք: Լուր մեզ, Աստուած Փրկիչ մեր. տուր մեզ զխաղաղութիւն քո. եւ արա առ մեզ զողորմութիւն քո, մարդասէր Տէր:

ՔԱՐՈԶ

Սարկաւագը: Եւ եւս խաղաղութեան զՏէր աղաչեսցուք:

Փառաւորեսցուք զամենակալն Աստուած, որ ծագեաց զլոյս առաւօտու յարարածս իւր. ծագեսցէ եւ այժմ զառատ ողորմութիւն իւր ի վերայ փառաբանչաց անուան իւրոյ: Ամենակալ Տէր Աստուած մեր, կեցո եւ ողորմեա:

ԱՂՕԹՔ

Քահանան: Կեցո Տէր եւ ողորմեա.

Զառաւօտու աղօթս եւ զբանաւոր պաշտօնս, ընկալ ամենակալ ամենամեծդ Աստուած, ի քո անապական եւ յերկնային խորանսդ: Ծագեա առ մեզ զարդարութեան եւ իմաստութեան զլոյս քո. արա զմեզ որդիս լուսոյ եւ որդիս տուընջեան. որպէս զի ի գալ աւուրս երկիւղածութեամբ վարեսցուք զկեանս մեր, եւ առանց գայթակղութեան կատարեսցուք: Զի դու ես օգնական եւ Փրկիչ մեր. եւ քեզ վայելէ փառք իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն:

ՍԱՂՄՈՍ

Դպիրքն: Տէր հովուեսցէ զիս, եւ ինձ ինչ ոչ պակասեսցի:

Ի վայրի դալարւոջ անդ բնակեցոյց զիս, եւ առ ջուրս հանգստեան սնոյց զիս:

Փառք Հօր եւ Որդւոյ եւ Հոգւոյն Սրբոյ.

Այժմ եւ միշտ եւ յաւիտեանս յաւիտենից. ամէն:

ԵՐԳ

Ճանապարհ եւ ճշմարտութիւն եւ կեանք Քրիստոս. առաջնորդեա հոգւոց մերոց. յերկրէ ելանել յերկինս:

Դուռն կենաց մտից Յիսուս. մոյծ եւ զմեզ առ Հայր քո եւ Հոգի. երգել միշտ զփառս:

ՅՈՐԴՈՐԱԿ

Ճանապարհ բարի Քրիստոս եւ ճշմարտութիւն. առաջնորդ հոգւոց մերոց յերկրէ ի յերկինս:

Դուռն կենաց մտից Յիսուս. Աստուած ճշմարիտ. մոյծ եւ զմեզ առ Հայրդ քո. Հոգւովդ Սրբով:

ՄԱՂԹԱՆՔ

Քահանան: Տէր ուղղեա զգնացս մեր ի ճանապարհս խաղաղութեան. Տէր, ուղղեա եւ առաջնորդեա հոգւոց մերոց եւ ամենայն հաւատացելոց գնալ յարդարութեան ճանապարհն եւ ի կեանսն յաւիտենից:

ՔԱՐՈԶ

Սարկաւագը: Աղաչեսցուք զամենակալն Աստուած զի յաջողեալ ուղղեսցէ զճանապարհս ծառայից իւրոց ի բարի եւ ի խաղաղութիւն: Ամենակալ Տէր Աստուած մեր, կեցո եւ ողորմեա:

ԱՂՕԹՔ Ի ՏՕՆՍ ՍՐԲՈՑ ԵՒ ՏԷՐՈՒՆԵԱՑ

Քահանան: Առաջնորդ կենաց եւ պարգեւիչ խաղաղութեան, Քրիստոս Աստուած մեր, առաջնորդեա մեզ գնալ ի ճանապարհս քո արդարութեան. եւ խաղաղութեամբ ժամանել ի նաւահանգիստն կենաց եւ փրկութեան շնորհօք ողորմութեան քո. զի դու ես օգնական եւ Փրկիչ մեր. եւ քեզ վայելէ փառք իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն:

ԱՂՕԹՔ ՅԱՒՈՒՐՍ ՊԱՀՈՑ

Քահանան: Օրհնեալ ես, Տէր Աստուած փրկիչ մեր, որ յամենայն ժամ ընդ մեզ ես, եւ ոչ երբէք թողուս ի ձեռանէ քումմէ զայնոսիկ որք հաւատով եւ ճշմարտութեամբ կարդան առ քեզ: Աղաչեմք եւ խնդրեմք ի քէն, Տէր, ճանապարհորդակից լեր ծառայից քոց քոյին վերակացութեամբ պահելով ի խաղաղութեան. եւ առաջնորդեա մեզ միւսանգամ խաղաղութեամբ եւ խնդութեամբ հասանիլ յիւրաքանչիւր բնակութիւնս ի Քրիստոս Յիսուս ի Տէր մեր: Որում վայելէ փառք իշխանութիւն եւ պատիւ. այժմ եւ միշտ եւ յաւիտեանս յաւիտենից. ամէն:

ԱՂՕԹՔ ՏԷՐՈՒՆԱԿԱՆՔ

Քահանան: Օրհնեալ Տէր մեր Յիսուս Քրիստոս. ամէն:

Հայր մեր որ յերկինս ես. սուրբ եղիցի անուն քո: Եկեսցէ արքայութիւն քո. եղիցին կամք քո որպէս յերկինս եւ յերկրի: Զհաց մեր հանապազորդ տուր մեզ այսօր: Եւ թող մեզ զպարտիս մեր, որպէս եւ մեք թողումք մերոց պարտապանաց: Եւ մի տանիր զմեզ ի փորձութիւն. այլ փրկեա զմեզ ի չարէ: Զի քո է արքայութիւն եւ զօրութիւն եւ փառք յաւիտեանս. ամէն:

 

Badwiran nor dam tzez 4

Namen-Bedeutungen / Männlich

Namen-Bedeutungen / Weiblich

Անձնաննուներն ու Իմաստները (Արական)

Անձնաննուներն ու Իմաստները (Իգական)

Granat1

 * Եւ եթէ մի տուն ինքն իր մէջ բաժանուի, այդ տունը չի կարող կանգուն մնալ։  (Մրկ. 3:25)

* Wenn eine Familie in sich gespalten ist, dann wird diese Familie keinen Bestand haben   (Markus 3:25)

* Աղաչեցէ՛ք հունձքի Տիրոջը, որ մշակներ հանէ իր հունձքին համար: (Մտթ. 9:37)

 * Bittet den Herrn der Ernte, dass er Arbeiter in seine Ernte sende. (Matthäus 9:37)

* Ո՜վ հայ ժողովուրդ, քո միակ փրկութիւնը քո հաւաքական ոյժի մէջ է:  (Եղիշէ Չարենց)