Ոգեկոչում 1915-ի Սուրբ Նահատակաց 24. April 2024, Dübendorf/ZH

Die Armenisch Apostolische Kirchgemeinde
lädt Sie herzlich dazu ein.

24. April 1915

Gedenktag für dieHeiligen des
Völkermordes an den Armeniern

Ոգեկոչում սրբոց նահատակաց որք կատարեցան
յընթացս ցեղասպանութեան հայոց
վասն հաւատոյ եւ վասն հայրենեաց

Mittwoch, 24. April 2024, um 11.00 Uhr
Röm. Katholische Kirche,
Leepüntstrasse, 8600 Dübendorf

* Der Gottesdienst wird in der Krypta stattfinden

armenian3ԿԱՐԳ ԲԱՐԵԽՕՍԱԿԱՆ ՍՐԲՈՑ ՆԱՀԱՏԱԿԱՑՆ
ՈՐՔ ԿԱՏԱՐԵՑԱՆ ՅԸՆԹԱՑՍ ՀԱՅՈՑ ՑԵՂԱՍՊԱՆՈՒԹԵԱՆ
ՎԱՍՆ ՀԱՒԱՏՈՅ ԵՒ ՎԱՍՆ ՀԱՅՐԵՆԵԱՑ

ՇԱՐԱԿԱՆ ՍՐԲՈՑ ՆԱՀԱՏԱԿԱՑՆ
ՀՐԱՇԱՑԱՆ ՊԱԿՈՒՑՄԱՄԲ (Օրհ. ԴԿ)

Հրաշացա՜ն պակուցմամբ բազմութիւնք երկնայինք
եւ մեծաւ պըշուցմամբ զահի´ հարան ազինք,
տեսանելով զհին Եդեմ` ասպարէզ հանդիսի
դըժոխաբորբ հըրոյն Կայինական ախտին,
եւ զնոր պատարագ այս նորոյս Հաբելի,
որոյ գոչումն արեան յարաժամ խօսի.
Տէ՜ր սուրբ եւ ճշմարիտ, մինչեւ յե՞րբ ոչ դատիս
Եւ ոչ խնդրես զիրաւունս դատաստանի:

Փառք Հօր եւ Որդւոյ եւ Հոգւոյն Սրբոյ, այժմ եւ միշտ եւ յաւիտեանս յաւիտենից. ամէն.

Եդի՜ն զանձինըս ի վերայ հայրենեաց
եւ բընիկ օրինաց, կարգաց, աւանդութեանց,
ո´չ փոխանակեալ զադամանդեան միամըտութիւն հաւատոց
ընդ փափուկ վայելմանց անցաւոր այս կենաց.
եւ զօրէն ցորենոյ ի յերկիր բարի անկեալ`
աճեցին ընդ միոյ հարիւրապատիկ.
Տէ՜ր սուրբ եւ ճշմարիտ, մինչեւ յե՞րբ ոչ դատիս
Եւ ոչ խնդրես զիրաւունս դատաստանի:

ԸՆԹԵՐՑՈՒԱԾ

Ալէլուիա, Ալէլուիա
Ուրախ լիցին ամենեքեան ոյք յուսացեալ են ի քեզ, յաւիտեան ցնծասցեն,
եւ բնակեսցես դու ի նոսա, պարծեսցին ի քեզ սիրելիք անուան քո (Սաղմ. Ե. 12)

Պօղոսի առաքելոյն յԵբրայեցւոց թղթոյն է ընթերցուածս (Ժ. 32-39)

            Արդ` յիշեցէ՛ք զաւո՛ւրսն զառաջինս, յորս լուսաւորեալք բազո՛ւմ ճգանց եւ չարչարանա՛ց համբերէք. մերթ` ի նախատինս եւ ի նեղութիւնս խայտառակեալք, մերթ կցո՛րդք այնպիսեաց վաստակաւորացն լինել: Քանզի եւ ընդ կապեալս չարչարեցարուք, եւ զյափշտակութիւն ընչի՛ց ձերոց խնդութեամբ ընկալարուք. քանզի գիտէիք թէ լաւագո՛յն եւս ստացուածս ունիք անձանց յերկինս, ուր կանն եւ մնան: Արդ, մի՛ մերժէք ի ձէնջ զհամարձակութիւնն ձեր, յորում կայ մեծա՛ց վարձուց հատուցումն. պիտո՛յ է ձեզ համբերութիւն. զի զկամս Աստուծոյ արարեալ հասջի՛ք աւետեացն: Զի փոքր մեւս եւս քան որչափ, որ գալո՛ցն իցէ` եկեսցէ եւ ո՛չ յամեսցէ: Զի արդարն իմ ի հաւատո՛ց կեցցէ. եւ եթէ յերկմիտս ոք իցէ, ո՛չ հաճեսցի ընդ նա անձն իմ: Բայց մեք ո՛չ եթէ երկմտութեա՛մբ եմք ի կորուստ. այլ հաւատովք ի փրկութիւն հոգւոց:

ԱՒԵՏԱՐԱՆ

Ալէլուիա օրթի:
Խաղաղութիւն ամենեցուն:
Եւ ընդ հոգւոյդ քում:
Երկիւղածութեամբ լուարուք:
Սրբոյ աւետարանիս Յիսուսի Քրիստոսի` որ ըստ Յովհաննու: (ԺԴ. 1-13)
Փառք քեզ, Տէր Աստուած մեր:
Պռօսխումէ:
Ասէ Աստուած:

Միˊ խռովեսցին սիրտք ձեր. այլ հաւատացէք յԱստուած եւ յիս հաւատացէք։ Ի տան Հօր իմոյ օթեվանք բազում են. ապա թէ ոչ՝ ասացեալ էր իմ ձեզ, Եթէ երթամ, եւ պատրաստեմ ձեզ տեղի։ Եւ եթէ երթամ եւ պատրաստեմ ձեզ տեղի, դարձեալ գամ եւ առնում զձեզ առ իս. զի ուր եսն իցեմ, եւ դուք անդ իցէք։ Եւ ուր երթամն՝ գիտիցէք, եւ զճանապարհն գիտիցէք։

Ասէ ցնա Թովմաս, Տէր, ոչ գիտեմք յոˊ երթաս, եւ զիա՞րդ զճանապարհն կարասցուք գիտել։ Ասէ ցնա Յիսուս, Ես եմ ճանապարհն եւ ճշմարտութիւն եւ կեանք. ոչ ոք գայ առ Հայր եթէ ոչ ինեւ։ Եթէ զիս գիտէիք, ապա եւ զՀայր իմ գիտէիք, եւ այսուհետեւ գիտասջիք զնա եւ տեսէք զնա։ Ասէ ցնա Փիլիպպոս, Տէր, ցոյց մեզ զՀայր, եւ շատ է մեզ։ Ասէ ցնա Յիսուս, Այսչափ ժամանակս ընդ ձեզ եմ, եւ ո՞չ ծանեար զիս, Փիլիպպէ. որ ետեսն զիս՝ ետես զՀայրն. եւ դու զիա՞րդ ասես եթէ Ցոյց մեզ զՀայր։ Ո՞չ հաւատաս եթէ ես ի Հայր եւ Հայր յիս է. զբանս զոր ես խօսիմ ընդ ձեզ, ոչ եթէ յանձնէ ինչ խօսիմ, այլ Հայրն որ յիս բնակեալ է` նա գործէ զգործսն։ Հաւատա՞յք ինձ, եթէ ես ի Հայր եւ Հայր յիս է. ապա թէ ոչ՝ գոնէ վասն գործոցն հաւատացէք ինձ։ Ամէն ամէն ասեմ ձեզ թէ որ հաւատայն յիս, զգործսն զոր ես գործեմ, եւ նա գործեսցէ, եւ մեծամեծս եւս քան զնոյնս գործեսցէ. զի ես առ Հայր երթամ։ Եւ զոր ինչ խնդրիցէք յանուն իմ` արարից զայն, զի փառաւորեսցի Հայր յՈրդի:

Շարական  (Հմբ. ԲՁ)

          Գոչեմք առ ձեզ սուրբ նահատակք հողանիւթեայ մարմնով հրեշտակք, մարտիրոսք սուրբ եւ վկայք, որք սրոյ մահուամբ կատարեցայք. յորդոր տօնիս ձեր յիշատակ արեան սրբոցդ հեղման վըտակ. առ տէր լիցին սուրբ պատարագ պահել ըզմեզ միշտ անվտանգ:

 Մաղթանք

      Քրիստոս Աստուած մեր, վասն Սուրբ Խաչի քո պատուականի, զխաղաղութիւն քո տուր մեզ Տէր:

Տուր մեզ Տէր:

     Վասն սրբուհւոյ Աստուածածնին, եւ Յովհաննու Կարապետին, եւ սրբոյն Ստեփանոսի Նախավկային, զխաղաղութիւն  քո տուր մեզ Տէր:

Տուր մեզ Տէր:

      Վասն սրբոց քոց առաքելոց, մարգարէից, վարդապետաց, մարտիրոսաց, հայրապետաց, ճգնաւորաց, կուսանաց, միանձանց եւ երկնային զօրացն, զխաղաղութիւն  քո տուր մեզ Տէր: 

Տուր մեզ տէր

      Եւ վասն նախկին լուսաւորչացն մերոց Թադէոսի եւ Բարթողիմէոսի, եւ սրբոց Յակոբեանց երջանիկ առաքելոցն. եւ սրբոյն Գրիգորի մերոյ Լուսաւորչին, եւ սրբոցն` Յակոբայ Մծբնայ հայրապետին, Մարուգէի ճգնաւորին, Մելիտոսի եպիսկոպոսին եւ Գէորգայ զօրավարին: Բարեխօսութեամբ յիշատակաւ եւ աղօթիւք սրբոց նահատակացն, որք կատարեցան յընթացս հայոց ցեղասպանութեան վասն հաւատոյ եւ վասն հայրենեաց, որոց այսօր է յիշատակ. զխաղաղութիւն եւ զմեծ զողորմութիւն քո պարգեւեա մեզ, մարդասէ´ր Տէր:

Ամէն:

Քարոզ

           Սուրբ ճգնաւորօքն աղաչեսցուք ըզՏէր, որք զչարսն պարտեցին, նեղութեանցն համբերեցին. լուսեղէն եւ երկնային անթառամ պսակացն արժանի եղեն: Աղօթիւք նոցա եւ բարեխօսութեամբ մեզ ողորմեսցի: Ամենակա´լ Տէր Աստուած մեր. կեցո´ եւ ողորմեա´:

 Աղօթք

            Պսակիչ սրբոց, Քրիստոս, որ պսակես զսուրբս քո, եւ առնես զկամս երկիւղածաց քոց, եւ նայիս սիրով եւ քաղցրութեամբ յարարածս քո: Լո´ւր մեզ յերկնից ի սրբութենէ քումմէ, բարեխօսութեամբ Սուրբ Աստուածածնին, եւ աղաչանօք ամենայն սրբոց քոց եւ սրբոց նահատակացն, որք կատարեցան յընթացս հայոց ցեղասպանութեան վասն հաւատոյ եւ վասն հայրենեաց: Լո´ւր մեզ, Տէ´ր եւ ողորմեա´, ներեա´, քաւեա´ եւ թող զմեղս մեր: Արժանաւորեա´ գոհութեամբ փառաւորել զՔեզ ընդ Հօր եւ ընդ Սուրբ Հոգւոյդ. այժմ եւ միշտ եւ յաւիտեանս յաւիտենից. ամէն: